राज्य महामार्गावर सार्वजनिक बांधकाम विभागाकडून धोक्याची सूचना, दिशादर्शक देणारे फलक लावले जातात. हे फलक वाहनचालकांना सूचना देण्यासाठी असतात. नवीन वाहनचालकांना मार्ग दाखवण्यासाठीही या फलकांचा उपयोग होतो. मात्र राजकीय मंडळी निव्वळ प्रसिद्धीपोटी आपली शुभेच्छांचे फलक या बोर्डवर लावतात. यामुळे या बोर्डवरील माहिती झाकली जाते. पालकमंत्र्याचा वाढदिवस होऊन महिना उलटला तरी शुभेच्छांचा फलक अजूनही न हटवल्यामुळे नागरिकांतून नाराजीचा सूर उमटत आहे.भुजबळांच्या येवला भेटीत पुढे असणारे स्वय-घोषीत नेत्याच्या या जाहिरातबाजीमुळे वाहनचालक त्रस्त झाले आहेत. सार्वजनिक बांधकाम विभागाला या फलकावरील जाहिराती बेकायदेशीर आहेत याचा विसर तर पडला नाही, अशी प्रतिक्रिया वाहनचालकांतून होत आहे. तात्काळ संबंधितांची चौकशी करुन दोषीवर कडक कारवाई करावी व या फलकावर दिशा दर्शकाची माहिती देण्याची मागणी प्रवाशी,वाहनचालकांतून होत आहे.